星期一, 1月 28, 2008

印度同事

我的印度下屬就快離開香港回去印度. 前一排請佢去西貢食海鮮大餐. 點了幾道菜, 包括美極煎大蝦碌, 椒 鹽賴尿蝦, 豉椒炒聖子王, 龍蝦伊面, 和姜汁芥蘭. 一邊食, 佢一路贊不絕口, 又話中國茶好飲. 期間佢講d印度人的生活習慣. 原來印度人好保守. 女朋友通常係經長輩介紹. 如果覺得ok, 可以約會去街. 不過如果兩個人單獨去街, 就幾乎已經等於定左親, 因為隔離倫舍的人見到你地拍拖就會認定你地會結婚, 如果之後你唔同個女仔結婚, 咁個女仔會好慘, 人地會認定個女仔有問題, 以後個女仔好難嫁得出. 所以印度男女好少去街拍拖, 相睇完ok, 就會好快結婚, 然後才拍拖, 慢慢互相了解. 另外, 個印度同事講佢在香港工作學習了一樣野, 就係要實話實說, 因為你講左ok, 做得到, 會做, 老細就預左你會做, 坐係度等結果. 佢話原來有d印度同事心想a就講b, 佢地乜都答ok, 其實個心從一開始已經無想過會真係幫你做, 佢只不過要應付左你, 為左甩身,先至答左ok, 然後走左, 當無左件事.

台灣yahoo: http://tw.myblog.yahoo.com/mr-market/
香港yahoo: http://hk.myblog.yahoo.com/mr-market/
新浪Sina: http://graham_choi2003.mysinablog.com/

6 則留言:

  1. 先生可以講下你 5仔 ELN 現況如何嗎 ?
    自動續期了???

    回覆刪除
  2. 先生在SCB工作嗎? 好少本地公司請印度人.不過我有朋友同印度人deal 過,發覺都有你講既問題.有些東西在Spec 有提但收貨時發覺係做到.問佢地又話唔知道,見唔到之類.高層就覺得印度又平又正,低層做收貨個d人就媽媽聲.

    回覆刪除
  3. 工作文化既差異,係香港老細比份TASK落黎,話無問題就等於話左自己做得掂,要負責

    回覆刪除
  4. 小小分享,大口仔因工作關係,我好多客戶都係印藉人士。其實印藉人士做生意好叻,數口好精,講價更加係無敵。哈!

    不過本地有錢既印度人真係好,大把十幾層樓無按揭收緊租。

    回覆刪除
  5. 印度人係香港同印度自己國家一樣,十億印度人有一億住在城市係中產同有錢人.9億係窮人.

    有錢既好多錢,窮既好鬼窮.

    嬰兒出生死亡率無記錯係全球最高

    好早有民主,法治較差.基建唔得.

    回覆刪除
  6. 回應無名士: 匯豐ELI未到期, 按目前的股價, 應該會自動續期多2個月.
    回應ngkf: 無可否認, 有些印度人technical 真係幾得, 同意印度非常貧富懸殊.

    回覆刪除