星期五, 8月 31, 2007

狼人應景之作

收到匯豐以股代息的信, 今次可以換到153股, 永久組合的匯豐將會增加至15,930股, 平均成本降至79.35. 現時匯豐股東係什麼景況? 睇狼人兄以下的作品領會下吧.



星期四, 8月 30, 2007

心理質素比選股能力更重要

你唔需要有出色的選股能力, 都可以知道市場上那些股票是優質股, 和為何他們是優質股的原因, 因為市面上有不少股票分析高手為你提供優質股的名單和理據, 例如, 你只要睇林森池的大作, 就知道2628中國人壽和941中國移動係值得投資的優質股. 但面對大跌市, 夠唔夠膽買, 或者夠唔夠繼續持有, 呢樣就投資專家都幫唔到你. 我有些朋友, 如果最近叫佢買股票, 佢通常會問, "會唔會再跌? 個市跌到底未?". 我認為佢地問錯問題, 買股票之前要問的問題應該係"點解呢間公司好? 就算呢間公司好, 但呢個價錢值唔值得買?". 大家要明白, 買股票賺錢唔需要買完即升, 即使買完之後股價即刻下跌, 唔會影響你最終賺錢的結果. 因為買股票最終會唔會賺錢係睇你買什麼股, 以什麼價錢買. 從我自己多年的實戰經驗得到的引證, 買股票要賺錢, 心理質素比選股能力更重要. 我在今個週末重溫過去2星期報紙財經版的頭版大標題和內容如下.

8月16日: 全球冧市越掟越驚, 恆指潟631點
8月17日: 全球股民大逃亡, 恆指挫703點, 考驗牛熊線, 基金經理, 學者和分析員對後市不表樂觀, 相信今次危機過後, 療傷過程會超過半年
8月21日: 港股飆1200點, 9年半最勁
8月22日: 港股升完千點, 回吐888點, 散戶應靠邊站
8 月23日: 全球升市, 港股漲617點
8月24日:港股升620點, 差600點創新高

如果大家留意報紙上的股票專家的投資意見, 通常會見到"市升睇升, 市跌睇跌"的意見, 參考價值其實唔高.


8月30日刊於《資本壹週》Capital Money 093, P.64 〈BLOG爆股壇〉

星期三, 8月 29, 2007

有意思的現象

今日睇生果報財經版, 被其中一個標題吸引左. 標題寫住"美銀行高層買公司股票", 內文寫美國銀行界和保險界高層人員紛紛於本月趁低買入自己公司股票, 金額達2.1億港元. 係12年來最多的1個月. 有分析員認為這種情況顯示業內高層人士對前景有信心, 而且認為公司股價被低估, 是最強烈的買入信. 但相反, 華爾街5大行包括高盛, 美林, 大摩, 雷曼和貝爾斯登的今個月並無高層人員增持自己公司股票.

由此可以估計未來傳統銀行保險業務和投資銀行邊個見到曙光先, 邊個就仍然要捱下黑夜.

另外, 在newsgroup見到唔少人對持有匯豐的回報失望, 唔係今年失望, 而係近呢1,2年都失望, 因為股價幾乎無進展, 不過其實呢個現象唔係匯豐獨有, 睇下花旗集團的股價, 4年來幾乎原地踏步, 股價表現甚至仲差過匯豐. 有人話持有匯豐係浪費機會成本. 我的睇法, 下之再講.

星期二, 8月 28, 2007

大升市要冷靜

今日股市表現唔使多講, 絕對係亢奮性上升, 恆生指數全日收市升655.84或2.86%, 報23,577.73點, 創新高, 成交額亦創新高, 全日成交金額錄得1,263.47億港元.中資股, 國企股全面上升, 中國熱潮派對如近期歌手在紅館開演唱會一樣, 欲罷不能, 不過紅館有限期要小休, 中資股熱潮幾時退熱就無人知. 我認為現時更需要冷靜. 我無意欲將新資金投入呢個中資股熱潮, 只會繼續持有手上低價買入的中資金融股. 不買不賣, 無為而治.

現時有時間我寧願睇下從珠海買回來的清朝電視連續劇.

星期日, 8月 26, 2007

張學友演唱會

今晚去紅磡體育館睇張學友演唱會. 初入場見到個舞台感覺好似細左d. 不過演唱會開始之後, 打左五顏六色的燈光之後, 配合埋煙花, 感覺即刻唔同晒, 正好多. 張學友非常落力演唱, 睇到佢好用心去表演, 而且係享受唱歌, 特別之處係無邀請嘉賓, 全晚學友表演晒, 而且唱到接近11點半才完場. 以學友的唱歌功力, 當然係一流水準, 佑唔到佢跳舞一樣咁放, 而且身手都唔錯, 條腿可以直線踢上頭頂. 相信學友經常有做運動, 我記得幾年前有1日我放假同朋友去馬會會所打羽毛球, 在更衣室, 見到學友和區丁玉, 佢地也是剛打完波.

學友今晚唱左首自己創作的歌俾佢大女和老婆, 相信佢大女和老婆會好lum,我最欣賞"錫"老婆和仔女的男人. 學友今晚講左段說話, 我覺得幾有意思, 唔單止可以應用在人生方面, 股市方面一樣0岩用. 佢話人的一生當中, 開心和唔開心的事都會有, 如果經歷緊唔開心的事情的朋友, 要堅持下去, 唔開心的事情總有1日會過去, 然後又輪到開心的事情來到, 人生總要有盼望而且可以成真, 不要放棄. 我認為呢個道理同樣可以應用在投資股票上. 股市有高潮有低潮, 股價有升的日子, 有跌的日子. 面對股市下跌, 不要憂心和惶恐, 要鎮定, 堅守手上優質股, 風暴總會過去, 等待調整完結大市見底回升, 又是另一番新的景象.

星期六, 8月 25, 2007

收買佬的世界

首先講一樣最悶的野先, 匯豐出左07年第2次以股代息換股價,多謝網友"沙家"第一時間在newsgroup通知大家, 今次換股價係US$17.5483, 大約係136.88港元, 好抵換, 今次我起碼可以換到152股.

另外, 今日睇生果報財經版, 美國銀行出手救Countrywide, 以156億港元購入Countrywide的優先股, 息率7.25厘, 而且可以以每股18美元換Countrywide的普通股, 如果最終換股, 將持有16%至17%而成為Countrywide的最大股東. Countrywide今年股價已經從高位40蚊左右跌左50%至20蚊以下, 所以今次美銀其實係趁佢病, 買平貨. 也證明現時係收買佬的世界. 匯豐最近擬購入Lone Star所持有51%韓國外換銀行股權, 涉及資金估計達49 美元, 因訴訟未決或需等3年以上. 但相信匯豐仍然會繼續留意市場上的其他收購機會, 隨時可能有驚喜.

另外見到3988中行出完中期業績之後, 因為市場憂慮佢持有89.65美元的美國次級按揭債券, 和6.82億美元的CDO Collateralized Debt Obligation即係抵押債務債券. 今日股價下跌5.38%至3.87, 如果股價於3.5以下, 我有興趣買些少.

最近幾間銀行包括349和183公佈的業績都唔錯, 未來發展機會仍然有可憧憬之處, 183接近6蚊我會買些少. 可惜349已經升上19蚊以上, 等股價回到17蚊以下再考慮. 呢D都係風險唔大的投機選擇.

星期四, 8月 23, 2007

網上天才小畫家 - 狼人

以下的作品出自一位很有才華的網上小畫家 - 狼人




最新組合update

今日股市繼續上升, 上星期的恐慌和憂慮好似已經煙消雲散, 結果恆生指數全日收報22966點,升620點,成交金額增至1145億元.

面對目前的市況, 我認為應該採取的態度係"升市唔好心雄, 跌市唔好心慌".

長線投資: 如果之前以好平的價錢買入的優質股, 可以繼續持有. 但目前一定唔係用新錢一筆過買入股票作長線投資的時候.

月供股票: 可以繼續, 唔使理會市況.

短線投機: 跌市就低買, 升市就由佢, 唔好高追.

至於我自己, 目前傾向有多餘錢就儲下來, 用新資金買股票的意欲不大.














買股票之前你會問什麼問題

上星期如果叫朋友買股票, 佢地通常會問"會唔會再跌架?", 或者"跌到底未架?". 然後通常佢地的決定係, "都係睇定d先". 結果當然係讓機會白白流失.
我在2001年911恐怖事件之後, 當匯豐股價跌穿78蚊開始買, 之後越買越跌, 最低跌到68.25, 直今我仍然持有當日買的匯豐, 計埋來緊10月4日會收到的07年第2次股息, 以每股計, 我一共收左30.87股息.
朋友, 試下以後買股票之前唔好問"會唔會再跌架?", 而係問"現價值唔值得買?"